କୁଜଙ୍ଗ , 18/08/2025, ବିକ୍ରମ ଓଡ଼ିଶା ନିୟୁଜ: କୁଜଙ୍ଗକୁ ଏନ୍ଏସି ଦାବି : 26 ମଙ୍ଗଳବାର ତହସିଲ ଘେରାଉ ନିଷ୍ପତି କୁଜଙ୍ଗ 18/8 ରାଜ୍ୟର 7 ଜିଲ୍ଲାରେ ନୂଆ 12ଟି ବିଜ୍ଞପିତ ଅଂଚଳ (ଏନ୍ଏସି)ଗଠନ କରିବାକୁ ସରକାରଙ୍କ ଗୃହ ଓ ନଗର ଉନ୍ନୟନ ବିଭାଗ ପକ୍ଷରୁ ବିଜ୍ଞପ୍ତି ପ୍ରକାଶ ପାଇବା ପରେ ପୂର୍ବ ସରକାରଙ୍କ ଦ୍ୱାରା ଘୋଷଣା ହୋଇଥିବା ଜଗତସିଂହପୁର ଜିଲ୍ଲା କୁଜଙ୍ଗରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି l ସୋମବାର ସନ୍ଧ୍ୟାରେ କୁଜଙ୍ଗ ସଚେତନ ନାଗରିକ ମଞ୍ଚ ପକ୍ଷରୁ ବରିଷ୍ଠ ନାଗରିକ ବାବୁରାମ ଚୌଧୁରୀଙ୍କ ଅଧ୍ୟକ୍ଷତାରେ ଆଜାଦ ହିନ୍ଦ କ୍ଲବ ଠାରେ ଏକ ସର୍ବଦଳୀୟ ବୈଠକ ଅନୁଷ୍ଠିତ ହୋଇଥିଲା l ଆସନ୍ତା 26 ତାରିଖ ମଙ୍ଗଳବାର କୁଜଙ୍ଗ ତହସିଲ ଘେରାଉ କରାଯିବ ଓ ମାନ୍ୟବର ମୁଖ୍ୟମନ୍ତ୍ରୀଙ୍କ ଉଦେଶ୍ୟରେ ଏକ ଦାବିପତ୍ର ତହସିଲଦାରଙ୍କ ମାଧ୍ୟମରେ ନାଗରିକ ମଞ୍ଚ ପ୍ରଦାନ କରିବ ବୋଲି ମଞ୍ଚ ଆବାହକ ରଘୁ ସାହୁ ଘୋଷଣା କରିଛନ୍ତି l ଉକ୍ତ ଦିନରେ ଏକ ବିଶାଳ ଶୋଭାଯାତ୍ରା କୁଜଙ୍ଗ ବଜାର ପରିକ୍ରମା କରି ତହସିଲଦାରଙ୍କ କାର୍ଯ୍ୟାଳୟକୁ ଆସିବ ବୋଲି ସଭାରେ ନିଷ୍ପତ୍ତି ହୋଇଛି l ଗଣମାଧ୍ୟମକୁ ପ୍ରତିକ୍ରିୟା ଦେଇ କବି ପିତାମ୍ବର ତରାଇ ଓ ଜିନମୟୀ ସାହାଣୀ କହିଥିଲେ ଯେ , ଶିଳ୍ପ ସମୃଦ୍ଧ ଆନ୍ତରଜାତିୟ ପାରାଦୀପ ବନ୍ଦର କୁଜଙ୍ଗ ତହସିଲ ମାଟିରେ ଗଢି ଉଠିଛି l କୁଜଙ୍ଗ ବଜାର ଲାଗି ମାତ୍ର 2 କିଲୋମିଟର ମଧ୍ୟରେ ହଜାର ହଜାର କୋଟି ତାଙ୍କର ଶିଳ୍ପ ଘୋଷଣା ହୋଇଛି l କୁଜଙ୍ଗର ଆର୍ଥିକ ସ୍ଥିତି ରାଜ୍ୟର ଅନ୍ୟାନ୍ୟ ସହର ଅପେକ୍ଷା କମ ନୁହେଁ l କୁଜଙ୍ଗରେ ବିଚାର ବିଭାଗୀୟ ଅତିରିକ୍ତ ଜିଲ୍ଲା ଅଦାଲତ ସହିତ ବହୁ ସରକାରୀ କାର୍ଯ୍ୟାଳୟ ରହିଛି ଓ ସମସ୍ତ ଭିତ୍ତିଭୂମି ଥିବାରୁ ଏନ୍ଏସି ପାଇଁ ବାରମ୍ବାର ଜନସାଧାରଣଙ୍କ ପକ୍ଷରୁ ଦାବି ହୋଇ ଆସୁଥିଲା l ତେବେ ପୂର୍ବ ନବୀନ ସରକାର 2024 ମସିହାରେ ପ୍ରଥମ ପର୍ଯ୍ୟାୟରେ 34 ଟି ଏନ୍ଏସି ଘୋଷଣା କରି କୁଜଙ୍ଗକୁ ବାଦ ଦେବାରୁ ଆନ୍ଦୋଳନ ମଥା ଟେକିଥିଲା l ଧାରଣା ଓ କୁଜଙ୍ଗ ବନ୍ଦ ହୋଇ ଆନ୍ଦୋଳନ ତୀବ୍ର ହେବାରୁ ଏପରି ଅସ୍ୱାଭାବିକ ସ୍ଥିତିରେ ତତକାଳିନ ସରକାରଙ୍କ ଏକ ପ୍ରତିନିଧି ଦଳ କୁଜଙ୍ଗ ଆସି ସ୍ଥିତି ପରଖି ଥିଲେ l ତହସିଲଦାର ଓ ବିଡ଼ିଓଙ୍କ ଅଂଚଳ ଆର୍ଥିକ ସ୍ଥିତି ରିପୋର୍ଟ ଯାଞ୍ଚ କରି ଆନ୍ଦୋଳନକାରିଙ୍କ ସହ ଆଲୋଚନା କରି ଫେରିବାର ସପ୍ତାହକ ମଧ୍ୟରେ ପୁନଃ 22 ଟି ଏନ୍ଏସି ଗଠନ କରି ସେଥି ମଧ୍ୟରେ କୁଜଙ୍ଗକୁ ସ୍ଥାନ ଦେଇଥିଲେ l ପୂର୍ବ ସରକାରଙ୍କ ନିଷ୍ପତିକୁ କୁଜଙ୍ଗବାସି ସ୍ୱାଗତ ଜଣେଇ ବାଣ ଫୁଟେଇ ମିଠା ବାଣ୍ଟି ଖୁସି ମନେଇ ଥିଲେ l ସରକାର ବଦଳିବା ପରେ ଇତି ମଧ୍ୟରେ ନୂଆ ସରକାର ନୂଆ ଏନ୍ଏସି ଗଠନ ପାଇଁ ଜିଲ୍ଲାପାଳଙ୍କୁ ରିପୋର୍ଟ ମାଗିଥିବା ଚର୍ଚ୍ଚା ହେଉଥିବାରୁ ଅଂଚଳ ବାସି ଏନ୍ଏସି ଗଠନ ନେଇ ଖୁସୀ ଥିଲେ l ହେଲେ ଗତ 16 ତାରିଖରେ ନୂଆ ସରକାର ଅଚାନକ 12 ଏନ୍ଏସି ଘୋଷଣା କରିଛନ୍ତି ଓ କୁଜଙ୍ଗ ବାଦ ପଡିଥିବାରୁ ଅଂଚଳରେ ଅସନ୍ତୋଷ ନିଆଁ ଲାଗିଛି l 26 ତାରିଖ ଆନ୍ଦୋଳନ ଅବଧି ମଧ୍ୟରେ ମାନ୍ୟବର ନଗର ଉନ୍ନୟନ ମନ୍ତ୍ରୀ ,ସ୍ଥାନୀୟ ବିଧାୟକ ତଥା ମନ୍ତ୍ରୀ ଓ ସାଂସଦଙ୍କୁ ମଧ୍ୟ ଅବଗତ କରାଯିବାକୁ ନିଷ୍ପତ୍ତି ହୋଇଛି lଆଜି ବୈଠକରେ ଅନ୍ୟ ମାନଙ୍କ ମଧ୍ୟରେ ମନିନ୍ଦ୍ର ଗୁରୁ , ମନୋଜ ପାତ୍ର ,ପ୍ରିୟମ୍ବଦା ପାଣି ,କୈଳାଶ ଷଢଙ୍ଗୀ , ସୁବାସ ମହାପାତ୍ର ,ଦୁଷ୍ମନ୍ତ ମାଝୀ ,ହୃଷିକେଶ ନାଥ ,ରବୀନ୍ଦ୍ର ନାଥ ,ବିଜୟ ଖଟେଇ ,ଓକିଲ ସଂଘ ନେତା ରଂଜିତ ବିଶ୍ୱାଳ ,ରଂଜିତ ପଣ୍ଡା ,ବିବେକାନନ୍ଦ ଦାସ ,ରାମଦାସ ମହାନ୍ତି ଓ ରଶ୍ମିରଂଜନ ଦାସ ପ୍ରମୁଖ ବକ୍ତବ୍ୟ ରଖିଥିଲେ l ତେବେ ନୂଆ ସରକାର ଆସିବା ପରେ କୁଜଙ୍ଗକୁ ଅବହେଳା ଘଟଣା ଏବେ ଜୋର ଚର୍ଚ୍ଚା ପାଲଟିଛି ଓ ଆଗାମୀ ଦିନରେ ଆନ୍ଦୋଳନ ଅସ୍ୱାଭାବିକ ସ୍ଥିତି ସୃଷ୍ଟି କରିବ ବୋଲି ଜଣା ପଡିଛି l ଦାବି ପୁରୁଣ ନ ହେଲେ ପ୍ରଶାସନକୁ ଅଚଳ କରିବେ ବୋଲି ବୈଠକରେ ନିଷ୍ପତ୍ତି ହୋଇଥିବା ଜଣାପଡିଛି l